Eftir Elísu

Eftir Elísu er verkefni sem unnið er af börnum og barnabörnum Elísu Steinunnar Jónsdóttur til að kynna list og líf hennar.

Steina

Þroskaleikfang og stofustáss

Leikfangið Steina er nytjalist sem listakonan Elísa Steinunn Jónsdóttir hannaði árið 1961. Fátt var um íslensk leikföng á þeim tíma og í stað þess að kaupa dæmigerð innflutt leikföng þá fór hún að hanna sín eigin fyrir börnin sín, því eins og allar mæður vildi hún það besta fyrir þau. Þannig varð leikfangið sem er nefnt eftir henni, Steina, til.

Nú, 65 árum síðar, hefur Steina í fyrsta sinn verið sett í framleiðslu og hægt að kynna það fyrir íslenskum börnum, foreldrum þeirra og unnendum íslenskrar hönnunar. Leikfangið er ætlað börnum frá þriggja ára aldri og er það framleitt úr beyki sem er talinn besti efniviðurinn fyrir barnaleikföng í dag.

Með því að setja Steinu í framleiðslu vilja ættingjar Elísu Steinunnar segja frá þeirri fallegu sögu sem liggur að baki leikfanginu og auka úrval íslenskra leikfanga fyrir íslensk börn að leika sér með.

Versla

Steina er unnin úr við úr sjálfbærum beykiskógum og er handsmíðað í Póllandi á litlu fjölskyldureknu smíðaverkstæði.

Sagan hennar Elísu

1935

Elísa fæddist á Snæfellsnesi 1935 og ólst upp á bænum Vaðstakksheiði utan Ennis. Hún var næstyngst í stórum systkinahópi og var alltaf stolt af uppruna sínum (hún er lengst til hægri á myndinni).
Ung dvaldi hún hjá ömmu sinni og afa á Haga í Staðarsveit, sem hafði mikil áhrif á hana, en mikil nýsköpun var höfð í hávegum hjá Kára afa hennar á mörgum sviðum búskaparins.
1947

Hún bjó á Snæfellsnesi til 12 ára aldurs og flytur svo á Framnesveginn í Reykjavík og gengur í Gaggó Vest. Hún fer einnig í einkatíma í listnámi til Jóhanns Briem.
1953

18 ára flytur Elísa til Kaupmannahafnar að læra útstillingahönnun í Magasin du Nord. Dvölin í stórborginni hafði mikil áhrif á hana og markaði upphafið að skapandi ferli sem átti eftir að móta líf hennar.
1957-1960

Á þessum árum bjó Elísa í Heidelberg og Cambridge, þar sem maður hennar, Gunnar, stundaði framhaldsnám í lögfræði. Á sama tíma sótti hún námskeið í keramik og málaralist.
1961

Elísa hannaði leikfangið Steinu þetta ár. Hér er hún með sonum sínum Jóni Gunnari og Kára Guðmundi í heimsókn hjá foreldrum sínum, Helgu og Jóni, að Ási í Melasveit.
1971-1974

Elísa bjó í New York á þessum árum þar sem maður hennar var ræðismaður hjá Sameinuðu þjóðunum. Á sama tíma ferðaðist hún víða og kynntist list og menningu ólíkra landa, sem hafði mikil áhrif á listsköpun hennar.
1975

Eftir að Elísa flutti heim frá Bandaríkjunum setti hún upp leirverkstæði í kjallaranum á Stýrimannastíg 8, í eigu tengdaföður hennar.
Þar hafði hún aðgang að fullkomnum brennsluofni sem hún flutti til landsins. Hún seldi verk sín í helstu listaverslunum landsins á þeim tíma, meðal annars Kúnígúnd.
1987

Draumur Elísu frá Kaupmannahafnarárunum rættist þegar hún stofnaði Gallerí List. Markmið hennar var að skapa vettvang þar sem listamenn gátu sýnt og selt verk sín á aðgengilegri hátt fyrir almenning. Elísa rak Gallerí List í 20 ár.
1990-2010

Elísa sló ekki slöku við og hélt áfram öflugri listsköpun og tók þátt í samsýningum.
2011-2016

Síðustu árin vann Elísa með hvítan leir, á tímabili sem einkenndist af mikilli sköpunargleði. Síðasta einkasýning hennar var haldin 2015, í tengslum við 80 ára afmæli hennar, í Safnaðarheimili Neskirkju. Hún lést ári síðar.